Garda Revolucionare e Iranit thotë se përgjigjja ndaj sulmeve do të shkojë “përtej llogaritjeve” të SHBA-së dhe Izraelit

---

Korpusi Islamik i Gardës Revolucionare të Iranit (IRGC) tha se përgjigjja ndaj sulmeve të Shteteve të Bashkuara mbi objektet bërthamore iraniane do të “shkaktojë pendesë të thellë”, shkruan CNN.

“Veprimi i sotëm i agresionit nga regjimi terrorist amerikan i ka dhënë Republikës Islamike të Iranit të drejtën legjitime për të vepruar në vetëmbrojtje, duke përfshirë opsione që shkojnë përtej llogaritjeve deluzionale të koalicionit agresor”, thuhet në një deklaratë të IRGC-së të publikuar në agjencinë shtetërore iraniane të lajmeve Tasnim.

IRGC – një forcë ushtarake me ndikim, paralele me ushtrinë konvencionale të Iranit – ka trajnuar, armatosur dhe financuar rrjetin e përfaqësuesve iranianë që shtrihen në Lindjen e Mesme.

“Korpusi Islamik i Gardës Revolucionare është i njohur mirë me realitetet e kësaj lufte hibride me shkallë të plotë dhe kurrë nuk do të trembet nga zhurma e Trumpit apo bandave kriminale që sundojnë Washingtonin dhe Tel Avivin”, thuhet në deklaratë.

“Pushtuesit duhet të presin përgjigje që do të shkaktojnë pendesë të thellë”, shtohet në deklaratë.

---